«Боотур тыйаатыра» Саха сценатын киинэ нөҥүө арыйыы
Суорун Омоллоон аатынан Опера уонна балет тыйаатыра бэйэтин көрөөччүлэригэр “Театр Боотура” (“Боотур тыйаатыра”) документальнай киинэни бэлэхтээтэ.
Режиссер уонна продюсер Мила Кудряшова киинэтэ Култуура көҕүлээһиннэригэр бэрэсидьиэн пуондатын өйөбүлүнэн уһулунна.
Киинэ Владислав Левочкин дириэктэрдээх Опера уонна балет судаарыстыбаннай тыйаатырын туһунан кэпсиир. Киинэни көрөөччү Уһук Илиҥҥэ биир кырдьаҕас уонна Хотугу эргимтэҕэ соҕотох Опера уонна балет тыйаатырын сыанатын кэтэҕэр баар буолан ылыаҕа, “Ньургун Боотур”, “Күлүмүрдүүр таас” уонна “Щелкунчик” испэтээктэргэ бэлэмнэнии түгэннэригэр «кыттыһыаҕа».
Киинэ араас идэлээх дьону: мусукааннары, үҥкүүһүттэри, вокалистары уонна худуоһунньуктары, гримердары уонна постижердары, администратордары уонна дизайнердары уо.д.а. көрдөрөр.
Екатерина Тайшина “Театр Боотура” киинэ биир сүрүн персонаһынан буолла. Балетмейстер “Щелкунчик” испэктээккэ үлэтин туһунан кэпсиир. Кини партнерун кытары киһини көҕүлүүр румба үҥкүүнү толорор.
Ити курдук, режиссер дьоруойдар майгыларын киэҥник арыйаары араас балаһыанньаҕа “түбэһиннэрэн” устубут. Итинник ньыманан уһуллубут “Театр Боотура” киинэ национальнай тыйаатыр устуоруйатын биир сүрүн страницатынан буолуоҕа, саха балетыгар интэриэһи үөскэтиэҕэ.
Балаҕан ыйын 17 күнүгэр норуот айымньытын дьиэтигэр, Өрөспүүбүлүкэбитигэр культура сылынан, П.М.Васильев аатынан Соловьев орто оскуолатын үөрэнээччилэрэ, уопсайа 23 оҕо «Боотур тыйаатыра» документальнай киинэни көрдүлэр.
Бу — тыйаатыр сыанатыгар тахсар опера уонна балет курдук сүдү айымньылар хайдах курдук сыралаах үлэттэн, түүннэри утуппат репетициялартан, артыыстар хас биирдии хамсаныыларыттан, көлөһүннэриттэн ситимнэнэн тахсалларын итэҕэтиилээхтик арыйар киинэ. Экран нөҥүө биһиги сахабыт сирин искусствотын эйгэтигэр күн аайы буолар кистэлэҥи — софиттар анныларыгар эрэ баар чаҕылхай олоҕу буолбакка, кулиса кэннинээҕи ыарахаттары, үрдүк ирдэбиллээх режиссураны уонна испэктээги чочуйууга барытын ууран туран үлэлиир айар куттаах дьон дьулуурун илэ харахпытынан көрдүбүт.
Тыйаатыр — бу син биир боотурдар охсуһар кыргыһыыларын курдук: манна кыайыы-өлүү, драма, өрөгөй баар. Киинэ аата да ону бэйэтэ этэ сылдьар. Биһиги бүгүн сыана дьоруойдарын эрэ буолбакка, кинилэр хорсун сүрэхтэрин, идэлэригэр бэриниилэрин сөҕө-махтайа көрдүбүт.
Туруорааччылар Дарья Ермолаеваҕа, Надежда Хлыстаҕа, киинэни устубут хамаандаҕа, барҕа махталбытын тиэрдэбит!