Мырылаҕа «Холумтан сылааһынан, сүрэх төлөнүнэн саҕыллыбыт олох» кинигэ сүрэхтэниитэ.
Билиҥҥи кэмҥэ уруулар-аймахтар, оҕолор дьоннорун, төрөппүттэрин үтүө ааттарын үйэтитэн араас кинигэлэри бэчээккэ бэлэмнээн таһаартарар буоллулар. Бу олус үчүгэй, нэһилиэк устуоруйатын үөрэтэргэ наһаа наадалаах.
Биир оннук олус суолталаах, баай ис хоһоонноох кинигэни, атырдьах ыйын күнүгэр, төһө да самыыр түстэр, төһө да тымныы буоллар үөрүүлээх, олус истиҥ тыыннаах күнү атаарбыппыт. Ол курдук нэһилиэкпитигэр биир ытыктанар ыалбытын Сыромятниковтары үйэтитэр «Холумтан сылааһынан, сүрэх төлөнүнэн саҕыллыбыт олох» кинигэ сүрэхтэниитэ буолан ааспыта.
Кинигэ-альбом, Мырыла детдомун дириэктэрэ, «Аҕа дойду Улуу сэриитин» I истиэпэннээх уордьан кавалера, сэрии бэтэрээнэ Петр Семенович Сыромятников уонна кини кэргэнэ Мария Андреевна Федосеева сэрии кэмин оҕото, тыыл, үлэ бэтэрээнэ оҕолорун, сиэннэрин олохторугар киһи буолар бигэ акылааты чиҥник оҥорбут, холобур буолар сыралаах дьоһун олохторо кэпсэнэр. П.М.Васильев аатынан Соловьев орто оскуолатын, сүүс сыллаах бэлиэ түгэнинэн таҕыста.
Кинигэ хайдах тахсыбытын туһунан улахан кыыстара, кинигэ ааптара, Саха Өрөспүүбүлүкэтин үөрэҕириитин туйгуна, РФ-я иитиигэ уонна үөрэхтээһиҥҥэ бочуоттаах үлэһитэ, РФ президенин гранын 2008 сыллааҕы хаһаайката, ПНПО (приоритетный национальный проект образование) «Россия бастыҥ учуутала» куонкурус кыайыылааҕа, онтон да элбэх бэлиэлэр хаһаайкалара Мария Касьяновна Муксунова олус умсугутуулаахтык кэпсээтэ.
Ону таһынан нэһилиэк түмэлин салайааччыта, кыраайы үөрэтээччи Иннокентий Иннокентьевич Собакин сүрдээх кэрэхсэбиллээхтик кинигэни ырытта, кэпсээн сырдатта.
Мырыла дьаһалтатын аатыттан исписэлиис Марфа Гаврильевна Николаева, П.М.Васильев аатынан орто оскуола кэллэктиибин аатыттан Татьяна Титовна Брызгаева тыл эттилэр, эҕэрдэлээтилэр.
Кэлбит ыалдьыттар саалаҕа киирэн истиҥник сэһэргэстилэр, кинигэ тула мустан санааларын сайа эттилэр, арыылаах алаадьыны сиэн, баай-талым минньигэс астаах остуол тула тото-хана аһаатылар.
Дьэ бу курдук, Соловьев нэһилиэгэр өссө биир саҥа кинигэ күн сирин көрөн, олохтоохторго дьоһун бэлэх буолла. Кинигэ сүрэхтэниитэ Мырыла нэһилиэгэр ыытыллыбыта олус кэрэхсэбиллээх . П.М.Васильев аатынан Соловьев орто оскуолата үбүлүөйдээх 100 сылын көрсө кинигэ бэчээттэнэн суолтата өссө күүһүрэр, дириҥ ис хоһооннонор. Нэһилиэк олохтоохторун кинигэни уларсан ааҕыҥ,нэһилиэккит устуоруйатын үөрэтиҥ диэн ыҥырабыт.