«ОСТУОРУЙА ДОЙДУТУН УСТУН АЙАН» КҮРЭХ.
Ыам ыйын 14 күнүгэр, Соловьев орто оскуолатын үөрэнээччилэригэр анаан «Төрөөбүт тыл биһигэ» киин оҕону кэпсиир дьоҕурун сайыннарар сыаллаах «Остуоруйа дойдутун устун айан» диэн уус-ураннык остуоруйалары, үһүйээннэри кэпсиир күрэҕи ыытта.
Күрэх саҕаланыыта олус ураты уонна кэрэхсэбиллээх буолла. Соловьев нэһилиэгэр бүтэһик соҕотох олоҥхоһуппут, Аҕа дойду сэриитин кыттыылааҕа, бэтэрээн Федоров Константин Лукич – Көскөйө Көстөкүүн «Таптал уонна үһүйээн» диэн үһүйээнинэн, библиотекарь Марианна Васильевна оскуола оҕолорун, учууталларын көмөтүнэн, оҕолорго анаан оҥорбут ойуулуктарын көрүүттэн саҕаланна. Бу оҕолор сүргэлэрин өрө көтөхтө.
Уопсайа 14 остуоруйа кэпсэннэ. Оҕолор бары олус үчүгэйдик бэлэмнэнэн кэлбиттэр, бары уус-ураннык, бэккэ хамсанан-имсэнэн, ис хоһоонун сөптөөхтүк тириэртилэр. Маннык тэрээһиннэр оҕо төрөөбүт тылынан саҥарар, суруйар тыла-өһө, кэпсиир дьоҕура сайдарын бигэргэтэр. Оҕо кинигэни ааҕан, ис хоһоонун өйдөөн сатаан кэпсиир буоллаҕына — ырытар, толкуйдуур дьоҕура сайдар, тылын баайа кэҥиир.
Слайданы салҕыы сыҕарытан көр:
Дьүүллүүр сүбэ түмүк таһаарар кэмигэр оҕолор «Саха төрүт үгэстэрин төһө билэҕин?» диэн кэрэхсэбиллээх викторинаҕа хоруйдаатылар, билиилэрин тургуттулар.
Кыайыылаахтары наҕараадалааһын:
• Кылаан бириис (Гран-при) хаһаайынынан: Сияра Семенова, 4-с кылаас үөрэнээччитэ.
• Мэҥэ сурук I таһымын ылары ситистилэр: Эрчимэн Николаев, 4-с кылаас, Ангелина Попова, 4-с кылаас.
• Мэҥэ сурук II таһымын ыллылар: Рая Игнатьева, 2-с кылаас, Амелия Федорова, 4-с кылаас.
• Мэҥэ сурук III таһымын ыллылар: Сайаана Семенова, 2-с кылаас, Айдын Саввин, 2-с кылаас, Сандаара Кириллина, 4-с кылаас.
• Онлайн күрэххэ Хахыйах начальнай оскуолатын үөрэнээччилэрэ эмиэ кыттан, мэҥэ сурук I таһымын ылары ситистилэр: Юлия Федорова (2-с кылаас), Алик Егоров (3-с кылаас), Вика Белолюбская (4-с кылаас).
Слайданы салҕыы сыҕарытан көр:
Бары да олус үчүгэйдик, уус-ураннык, долгутуулаахтык кэпсээннэр биһигини үөртүлэр! Бары кыайыылаахтары эҕэрдэлиибит!
Бу тэрээһини тэрийбит «Төрөөбүт тыл биһигэ» киин үлэһиттэригэр, кыттыбыт оҕолорго, учууталларга барҕа махталбытын тиэрдэбит!