ҮЛЭ, ЭЙЭ, МААЙ УОННА УЛУУ КЫАЙЫЫ!
Күлүм гынар күннэр кэмигэр нэһилиэкпитигэр үөрүүлээх да, бэлиэ да түгэннэр элбэхтик буолан аастылар.
Ыам ыйын 1 күнэ – Үлэ уонна Эйэ бырааһынньыга: Аан дойду үлэһиттэрин сомоҕолоһуутун уонна сайыҥҥы сандал сааһы көрсөр Ыам ыйын 1 күнүгэр, нэһилиэкпит уран тарбахтаахтара, сатабыллаах хаһаайкалара бэйэлэрин оҥоһуктарынан кэрэ выставканы туруоран харахпытын сымнаттылар, дууһабытын үөртүлэр. Ону таһынан, күрэхтэргэ – корнхоллга уонна дартска – көхтөөхтүк кыттан, көрүлээтибит, оонньоотубут.
«Ааҕар саха сайдам ыала» дьиэ кэргэн олимпиадата: Бу үөрүүлээх күн нэһилиэкпит тыа сирин түөлбэтин баһылыгын эбээһинэһин толорооччу Туяра Михайловна «Ыал саргыта» улуус пилотнай бырайыагын чэрчитинэн, «Төрөөбүт тыл биһигэ» киин иһинэн ыытыллыбыт «Ааҕар саха сайдам ыала» дьиэ кэргэн олимпиадатын кыайыылаахтарыгар Ангелина уонна Мавра Николаевна Поповтарга I үрдэл дипломнарын туттарда. Ситиһии инники да баар буоллун!
Улуу Кыайыыны көрсө ыытыллыбыт тэрээһиннэр: Кыайыы күнүгэр бэлэмнэнэн нэһилиэкпитигэр оскуола оҕотуттан саҕалаан тэрилтэлэринэн ырааһырдыы үлэлэрэ ыытылыннылар.
П.М.Васильев аатынан Соловьев орто оскуолатын үөрэнээччилэрэ сэрии кэмин оҕолоругар араас көмөнү оҥордулар, эҕэрдэлээтилэр.
Оскуола уонна уһуйаан оҕолоругар анаан, байыаннай, патриотическай араас сырдатар тэрээһиннэр ыытылыннылар.
Кыайыы күнүгэр бэлэмнэнэн түннүктэри, тэрилтэлэр тастарын киэргэтии буолла.
Ыам ыйын 9 күнэ – Улуу Кыайыы күнэ: Улуу Кыайыы 81 сылын көрсө Кыайыы скверыгар үөрүүлэх, өрөгөйдөөх тэрээһин ыытылынна. Ол кэннэ Кыайыы эстафетата уонна өйдөбүнньүк чүмэчи ууруута буолла. Хорсун дьоммут ааттара үйэ-саас умнуллубат!
Бу кылаан тэрээһиннэри тэрийбит дьоҥҥо, кыттыбыт кэпсээччилэргэ, оҕолорго, учууталларга барҕа махталбытын тиэрдэбит!