Егор Афанасьевич Борисов.
70 сыл аннараа өттүгэр атырдьах ыйын 15 күнүгэр Чурапчы сиригэр-уотугар улахан судаарыстыбаннай диэйэтэл, Россия, Саха Сирин биллиилээх политига, экономиһа, экономическэй наука доктора, Саха Сирин үһүс Бэрэсидьиэнэ, бастакы Ил Дархана күн сирин кербүтэ. Егор Афанасьевич Борисов мээнэ киһи ыттыбат үрдэлигэр тахсан, политиканы өтө көрөр дьоҕурунан, Россия уонна Уһук Илин федеральнай уокурук салайааччыларын кытта уопсай тылы булар сатабылынан күн бүгүн дойду политикатын быһаарсар сенатор быһыытынан үлэлии сылдьар.
Кэлэр кэнэҕэски саха норуотун ыччатыгар кини үлэлээбит үлэтэ, кини олоххо тутуһан кэлбит принциптэрэ холобур буолуохтара. Ол курдук, 2016 сыллаахха Егор Афанасьевич дьиэ кэргэнин уонна Чурапчы улууһун администрациятын көҕүлээһининэн кини тус архив-библиотеката төрөөбүт Чурапчытыгар арыллан үлэтин саҕалаабыта. Библиотека фондатыгар күн бүгүн 100-н тахса хартыына, 4000 кэриҥэ кинигэ, 600-чэ араас дойдулартан сувенирдар дьон-сэргэ көрүүтүгэр-истиитигэр уонна туһаныытыгар кэлэн тураллар. Соловьев нэһилиэгин олохтоох бибилэтиэкэтигэр сорох экспонаттара уонна кинигэлэрэ кэлэн выставкаҕа турдулар.
Ханнык да киһи бу дойдуга салайааччы буолан төрөөбөт, кыраттан саҕалаан дьаныардаахтык үлэлээбит, бэйэтин билиитин-көрүүтүн көдьүүстээхтик сайыннарбыт киһи эрэ туох эмэ ситиһиилэнэр. Оннук киһинэн биһиги Егор Афанасьевиһы ааҕабыт. Кини дойду экономиката айгыраан эрэр 90-с сыллар саҕаланыыларыттан, уларыта тутуу сылларыгар, Россия уонна Саха Сирэ саҥа ырыынак усулуобуйатыгар киирэн сыһыаннаһыыларыттан саҕалаан 2018 сылга дылы республика сайдыытыгар элбэҕи оҥордо. Кини олоҕун кэмнэрин уонна үлэлээбит үлэлэрин бу ссылканан киирэн көрүҥ, сэргээҥ: https://rutube.ru/video/private/1777a4d80d560d3a99263a24252abd89/?p=FxdTaRuDiDP4IH_nhTPPGg
Ахсынньы 5 күнүгэр олохтоох бибилэтиэкэбитигэр ытыктыыр, убаастыыр, киэн туттар биир дойдулаахпыт, бөдөҥ судаарыстыбаннай, политическэй диэйэтэл Егор Афанасьевич Борисов үбүлүөйдээх сылыгар анаммыт олоҕун, үлэтин сырдатар түмүктүүр тэрээһин буолан ааста.
Күндү ааҕааччыларбытыгар, кэлэн сэҥээрэн истибиккитигэр, көрбүккүтүгэр махтанабыт!