«Омуннаах олоҥхо, Дьүрүһүйэр хомус»
Сэтинньи 25 күнэ — олоҥхо күнэ. Олоҥхо – өбүгэбит кэриэс бэлэҕэ, тулхадыйбат модун санаабыт тирэҕэ, саха норуотун тылынан уус-уран айымньытын саамай үрдүк чыпчаала.
Сэтинньи 30 күнэ — Хомус күнэ. Ил Дархан Егор Борисов 2011 сыллаахха бэс ыйын 27 күнүгэр таһаарбыт ыйааҕынан Саха Өрүспүүбүлүкэтигэр Хомус күнэ сэтинньи ый 30 күнүгэр бэлиэтэнэр. Саха хомуһа нарын-намчы, тыаһа ырааһынан, тыына уһунунан аан дойдуга аатырыан аатырар.
Бүгүн Сэтинньи 26 күнүгэр Д.М.Васильев аатынан норуот айымньытын дьиэтигэр олоҥхо нэдиэлэтин декадатынан Өрөспүүбүлүкэтээҕи «Олоҥхо дьыктаана — 2024» аахсыйаҕа кытынныбыт. Дьыктааны аахта уонна бэрэбиэркэлээтэ П.М.Васильев аатынан Соловьев орто оскуолатын саха тылын учуутала Мавра Николаевна Попова. Дьыктаан түмүгүнэн бастакы миэстэ хаһаайкатынан буолла Антонина Анисимова, иккис миэстэни ылары ситистэ Сардаана Федорова, үһүс бочуоттаах миэстэни ылла Анатолий Христофоров.
Ону таһынан Мырыла нэһилиэгин олоҥхоһуттарын быыстапката уонна «Олоҥхо дойдутугар айан» кинигэ быыстапката турда.
Ол кэннэ олоҥхо ыһыаҕын «ГРАН-ПРИ» хаһаайынын Анатолий Николаевич Христофоров толоруутугар «Дьулуруйар Ньургун Боотур» олоҥхону кэлбит дьон сэҥээрэ иһиттибит.
Ону тэҥэ кэлэн иһэр хомус күнүнэн, Дарина Кирилловна Слепцова толоруутугар хомус дьүрүһүйэр, саппаҕырбыт санааны сайгыыр, күүһү-уоҕу, эрчими биэрэр, киһини уратытык уоскутар, уйуһутар уратылаах тыаһын дуоһуйа иһиттибит.
Кыттыыны ылбыт дьоммутугар махтанабыт!