Сэтинньи 25 күнэ — Тимофей Егорович Сметанин төрөөбүт күнэ (25.11.1919—04.08.1947).
Бүгүн фронтовик суруйааччы, прозаик, поэт, Аҕа дойду Улуу сэриитин кыттыылааҕа Тимофей Егорович Сметанин төрөөбүтэ 105 сыла.
Олоҕун олуктара
1919 сыллаахха сэтинньи 25 күнүгэр Орто Бүлүү улууһун кырыы нэһилиэгэр Чачыга (кэлин Кэбээйи нэһилиэгэ, Кэбээйи улууһа) дьадаҥы дьиэ кэргэҥҥэ төрөөбүт.
Оскуолаҕа хойутаан, төрөппүттэриттэн көҥүлэ суох, 11 сааһыгар 1930 сыллаахха, үөрэх дьыла бүтэрэ чугаһаабытын кэннэ киирбит. 1933 сыллаахха ситиһиилээхтик төрдүһү бүтэрбит. Онтон 13 сааһыгар Калинин аатынан колхуос көмөлөһөөччү суоччутунан анаммыт. Онтон Намҥа киирэн суоччут куурсун бүтэрэн 1934 сыл олунньутуттан колхуоһугар суоччут буолбут.
1936—37 үөрэх сылларыгар Кэбээйи оскуолатыгар кэлин биллиилээх поэт буолбут Пантелеймон Тулааһынап директорынан үлэлии сылдьан литературнай куруһуок ыыппыт. Ол куруһуокка Тимофей актыыбынай чилиэнинэн буолбут, илиинэн таһаарар сурунаалларыгар худуоһунньуктаабыт.
1942 сыл атырдьах ыйыгар Кэбээйи оройуонун военкоматынан Аармыйаҕа ыҥырыллыбыт. 284-с минометнай полкаҕа сулууспалаабыт, старшай телефонист. «Хорсунун иһин» (18.01.1944)[1], «Бойобуой өҥөлөрүн иһин» (22.06.1943)[2] мэтээллэринэн наҕараадаламмыт. Фронтан, ыалдьан, 1944 сыллаахха төннүбүт.
Саха литературатыгар ѳлбѳт – сүппэт айымньылары биэрбит Тимофей Егорович айар үлэтин үгэнигэр, 28 эрэ саастааҕар күн сириттэн арахсыбыта.
Бүгүҥҥү тэрээһин
Бүгүн сэтинньи 25 күнүгэр олохтоох бибилэтиэкэҕэ, Тимофей Егорович Сметанин сырдык аатын кэриэстээн, П.М.Васильев аатынан Соловьев орто оскуолатын 8-с кылааһын үөрэнээччилэригэр, учууталлара Мавра Николаевна Поповалыын, библиотечнай уруок ыытылынна. Оҕолор Тимофей Егорович айар үлэтин, олоҕун-дьаһаҕын туһунан билистилэр уонна 2 хамаандаҕа арахсан тургутук оонньууга көхтөөхтүк оонньоотулар.
Ону тэҥэ Саян Алексеев бэйэтэ айбыт «Мин Мырылам» хоһоонун дорҕоонноохтук ааҕан иһитиннэрбитин бары сэҥээрэ иһиттибит:
Мин Мырылам.
Таптыыбын мин Мырылабын ,
Куустээх Тэйэр Хайаларын ,
Сайыҥҥы күөх кырдалларын,
Кыһыҥҥы кэрэ кырыаларын,
Хонууларга үүнэр сибэккилэрин,
Түүннэри ардахтар түһэллэрин.
Кыыс Аммабыт кытыла,
Сардаананан туолара ,
Сайыҥҥы киэһэ сөрүүнэ,
Сылааһынан сиэтэрэ.
Алексеев Сайаан
Оҕолорбут бу курдук духуобунай өттүнэн үүнэн-сайдан, күүһүрэн иһэллэригэр баҕарабыт!