Сахалыы дьыктаан.
Бүгүн олунньу 17 күнүгэр Д.М.Васильев аатынан НАДь «Төрөөбүт тыл, сурук-бичик» күнүн чэрчитинэн сахалыы дьыктаан суруйдубут. Саха Сирин бастакы Президена М.Е.Николаев 1996 сыл олунньу 9 күнүнээҕи 1294 №-дээх «Төрөөбүт тыл уонна сурук-бичик күнүн биллэрии туһунан » ыйааҕыгар олоҕуран, биһиги биир дойдулаахпыт Семен Андреевич Новгородов төрөөбүт күнэ — олунньу 13 күнэ — Төрөөбүт тыл уонна сурук бичик күнүнэн биллэриллибитэ. Бу күн олохтонуута Саха Сирин төрүт олохтоохторун саха лингвист учуонайа, бастакы саха үөрэҕин кинигэлэрин таһаарааччы Семен Андреевич Новгородов сырдык кэриэһин үйэтитэр, аатын ытыктатар соруктаах. Төрөөбүт тылга, сурукка-бичиккэ аналааах декда чэрчитинэн сахалыы таба суруйуу үөрүйэҕин олохсутар, иҥэрэр сыаллаах «Сахалыы дьыктаан аахсыйа» Дьыктааны суруйууну Хотугулуу-Илиҥҥи норуоттар тылларын, култуураларын үөрэтэр институт саха тылын кафедрата уонна Национальнай библиотека тэрийиилэринэн 2014 сыллаахтан ыытыллар. быйыл бу аахсыйа тэриллибитэ 10 сыла. Бүгүн Василий Семенович Яковлев — Далан «Дьикти саас» романыттан «Сааскы булт» диэн 151 тыллаах тиэкиһи суруйдубут. Дьыктааны П.М.Васильев аатынан Соловьев орто оскуолатын, саха тылын учуутала Мавра Николаевна Попова аахта. Дьыктааны суруйуу түмүгүнэн, уопасайа 10 киһи кыттыбытыттан «Үчүгэй суруксут» ааты иҥэриннэ Ульяна Кронникова, олохтоох ветеринария сэбиэдиссэйэ. «Бастыҥ суруксут» аатын ылла П.М. Васильев аатынан Соловьев орто оскуолатын алын кылаас учуутала Алена Николаевна Соловьева. «Бастыҥтан бастыҥ» аат хаһаайкатынан буолла М.И. Макарова аатынан участковай балыыһа медсиэстэрэтэ Анна Кимовна Дьячковская. Нэһилиэкпитигэр «Төрөөбүт тыл, сурук-бичик күнүн» чэрчитинэн ыытыллыбыт өрөспүүбүлүкэтээҕи сахалыы дьыктаан аахсыйаҕа кыттан, сахалыы таба суруйууга холоммут, олоххо мэлдьи актыыбынай көрүүлээх дьоммутугар истиҥ махталбытын тиэрдэбит!
