Нэһилиэктэр икки ардыларынааҕы уус-уран самодеятельность «Айхаллан Чурапчы» бэстибээлэ.
Олунньу 15 күнүгэр Д.М. Васильев аатынан НАДь сылын аайы ыытыллар «Айхаллан Чурапчы» нэһилиэктэринэн уус-уран самодеятельность бэстибээлэ Мырылаттан саҕаланна. Бэстибээл Арассыыйаҕа «Дьиэ кэргэн», Сахабыт Сиригэр «О5о аймах», Чурапчыбытыгар «Ыал Саргыта» сылларыгар анаан ыытыллар. Бэстибээл кэнсиэрин сүрүн тутула Аан дойду киһи аймаҕын чулуу айымньытынан ааттаммыт саха олоҥхотугар ананна, быыстапка кыл-сиэл оҥоһуктарга тэрилиннэ. Кэнсиэр саха биллиилээх олоҥхоһута И.Г.Теплоухов — Тимофеев 155 сылынан «Куруубай Хааннаах Кулун Куллустуур» олоҥхотун ис хоһоонугар олоҕуран туруорулунна. Нэһилиэк быйылгы бэстибээлигэр ыччат дьон хото кытынна. Кыл-сиэл оҥоһуктар быыстапкаларын ис киирбэхтик, дьоһуннук тэрийбиттэр. Бэстибээл саҥа талааннары арыйда — баянист Михаил Павлов (Муоматтан кэлбит Д.М. Васильев аатынан НАДЬ саҥа үлэһит), Айтал Соловьев (Амматтан кэлбит Д.М. Васильев аатынан НАДЬ саҥа үлэһит), тойуксут Наталья Сергеева, биһиги киэҥ туттар олоҥхону толорооччубут Анатолий Христофоров оркестрынан абааһы ырыатын уонна уус-уран ааҕыыга олоҥхоттон быһа тардан толоруута кэнсиэри киэргэттэ, оһуохайдьыт Лена Яковлева толоруута кэрэхсэбили ылла. Ону таһынан хор толоруутугар «Алгыс ырыата» (хормейстер Антонина Анисимова), Айтал Соловьев толоруутугар «Сорук Боллур» ырыата биһирэннэ. Фестивальбыт этэҥҥэ түмүктэммитинэн!
