Соловьевская библиотека

Василий Сергеевич Соловьев – Болот Боотур

Саха норуодунай суруйааччыта, Аҕа дойду Улуу сэриитин кыттыылааҕа, учуутал,  П. А. Ойуунускай аатынан  СӨ Государственнай  бириэмийэтин лауреата, Аҕа дойду Улуу сэриитин I –кы степенэ, Албан Аат III – c степенэ уордьаннар, бойобуой мэтээллэр кавалердара, СӨ култууратын үтүөлээх үлэһитэ төрөөбүтэ 110 сыла

   Василий Сергеевич Соловьев-Болот Боотур 1915 с. муус устар 15 күнүгэр Чурапчы улууһун Чэппиэдэй Хатылы (Мырыла) нэһилиэгэр төрөөбүтэ. Кини олоҕор, оччотооҕу көлүөнэ үгүс дьонунуу, эрэй-кыһалҕа, балыллан хаайыллыы, дьаныардаах  үлэ, үөрүү-өрөгөй барыта баара.Ол эрэн кини олох очурдарыттан иҥнибэккэ, эрэллээхтик уонна айымньылаахтык  үлэлээн, саха литературатыгар төрөөбүт норуотун олоҕун кэрэһэлиир, өлбөт-сүппэт сүдү айымньылары суруйан  хаалларбыт сүҥкэн үтүөлээх-өҥөлөөх.

    Василий Сергеевич учуутал идэтин талан, эдэр ыччаты иитэр-үөрэтэр, сырдыкка, кэрэҕэ угуйар  идэҕэ олоҕун 40 тахса сылын анаабыта.

    Бастакы хоһоонноро 1932 сылтан хаһыакка бэчээттэммиттэрэ.1957 с.  «Ол күн» бэйэмэтин  иһин уус-уран литэрэтииринэй  куонкуруска 2-с бириэмийэни ылбыта.Бэйэтэ уус-уран литератураҕа киириитин ити сылтан ааҕара.

   Василий Сергеевич 1966 с-ха ССРС суруйааччыларын сойууһун чилиэнинэн буолбута. Бу сылтан кини литэрэтиирнэй  эйгэҕэ Болот Боотур диэн аатынан биллэр.

   1967 с. «Сааскы дьыбардар» диэн романын  иһин өрөспүүбүлүкэтээҕи  литэрэтииринэй  куонкуруска I бириэмийэни ылбыта

   Василий Сергеевич Аҕа дойду Улуу сэриитин кыттыылааҕа, Аҕа дойду Улуу сэриитин I — кы степенэ, Албан Аат III-с  степенэ  уордьаннар,  бойобуой  мэтээллэр кавалердара.

   1986 с.  «Уһуктуу» трилогиятын иһин Платон Алексеевич Ойуунускай аатынан Судаарыстыбаннай бириэмийэ лауреатынан буолбута.

   1991 с.  Саха сэбиэскэй литэрэтиирэтин  сайдыытыгар улахан кылаатын  иһин Василий Сергеевич Соловьев-Болот Боотурга Саха АССР норуодунай суруйааччыта бочуоттаах аат иҥэриллибитэ. Биир дойдулаахпыт, тапталлаах суруйааччыбыт Василий Сергеевич Соловьев-Болот Боотур 1993 сыл ыам ыйын 24 кунугэр ыарахан ыарыыттан күн сириттэн барбыта.

   В.С.Соловьев-Болот Боотур аатын Хатылы орто оскуолата  1995 сылтан чиэстээхтик сүгэр. Кини олорон ааспыт олоҕо, суруйан хаалларбыт айымньылара билиҥҥи кэнчээри ыччакка өлбөт- сүппэт  өйдөбүлүнэн, үтүө  холобурунан буолар.

Соловьев Василий Сергеевич — Болот Боотур олоҕун, айар үлэтин  уонна айымньыларын хомуурунньугун  сыылканан киирэн ааҕыҥ, сэргээҥ: Соловьев Василий Сергеевич–Болот Боотур | Национальная библиотека РС(Я)

Видео-презентация: https://rutube.ru/video/23eca63898945bdfaa4dd47ab2c7f112/?r=plemwd