Улуу убайбыт Былатыан Ойуунускай төрөөбүтэ 131 сыла.
… Үс саха төрүөҕэр,
Үөрүүлээх күнүгэр
Мин ырыам ылланыа…
Мин аатым ааттаныа…
… Кэриэһим кэннибэр хааларым
Кэхтибэт кэрэкэ тылларым…
Платон Алексеевич Ойуунускай (Слепцов) 1893 с. сэтинньи 11 күнүгэр Таатта улууһугар төрөөбүтэ. Поэт, прозаик, драматург, сахалартан биир бастакы лингвист-учуонай, общественнай уонна государственнай деятель. Саха сирин суруйааччыларын союһун бырабылыанньатын бастакы бэрэссэдээтэлэ. ССРС Үрдүкү Сэбиэтин депутата.
Бастакы хоһооно «Үлэһит ырыата» Е.М. Ярославскай сорудаҕынан 1917 с. суруллубута.
1921 с. «Интернационалы» сахалыы тылбаастаабыта. Кини бастыҥ хоһоонноро — норуот уоһуттан түспэт ырыалар. Саха хоһоонугар уларытыыны киллэрбитэ: силлабо-тоническай системаны олохтообута. «Кыһыл Ойуун» драматическай поэманы М.Горькай уһулуччулаах айымньынан сыаналаабыта.
Сахалартан биир бастакынан В.И.Ленин уобараһын айбыта.
Кэпсээнинэн айымньыларыттан «Улуу Кудаҥсаны» ордук бэлиэтиир сөп. Олох уларыйыытын көрдөрөр «Большевик» драмата (1928 с. ) — бэлиэ айымньы.
Норуот айымньытын баһааҕырдар кэмҥэ, бары күүһүн-күдэҕин ууран, «Дьулуруйар Ньургун Боотур» олоҥхону дьулуурдаахтык суруйан хаалларбыта. Бу олоҥхону нууччалыы В.Державин тылбаастаан, П.А.Ойуунускай аатынан Саха Республикатын государственнай бириэмийэтин ылбыта.
1937 с. сымыйанан буруйданан хаайыллыбыта уонна 1939 с. алтынньы 31 күнүгэр 46 сааһыгар Дьокуускай түрмэтигэр төлөннөөх сүрэҕэ тэппэт буолбута. Кини төһө да кылгас үйэлэннэр, кэннигэр уһун үйэлээх кэрэ айымньылары хаалларбыта.
Сэтинньи 11 күнүгэр Соловьевтааҕы олохтоох бибилэтиэкэҕэ Саха сэбиэскэй литературатын төрүттээччи Платон Алексеевич Ойуунускай (Слепцов) төрөөбүтэ 131 сылыгар аналлаах, П.М.Васильев аатынан Соловьев орто оскуолатын 7-8 кылаас үөрэнээччилэригэр, библиоурок ыытылынна. Кинилэр улуу суруйааччыбыт төрөөбүт дойдутун сайдыытыгар анаабыт олоҕун, үлэтин билистилэр.
Саалаҕа «П.А.Ойуунускай төрөөбүтэ 131 сыла» кинигэ быыстапката тэрилиннэ.
Платон Алексеевич Ойуунускай – норуот чулууу уола. Кини олорбут олоҕо, охсуспут охсуһуута, ыүлэлээбит үлэтэ, айбыт айымньылара эдэр ыччакка үтүө холобур буолар.