БИБИЛЭТИЭКЭ КҮНЭ УОННА МЫРЫЛА БИБИЛЭТИЭКЭТИН УСТУОРУЙАТА!
Күндү ааҕааччыларбыт! Бүгүн, ыам ыйын 27 күнүгэр Бүтүн Арассыыйатааҕы библиотека күнэ.
«Кинигэ — билии төрдө, кинигэ — үтүө доҕор, сүбэһит» диэн дириҥ суолталаах этиилэр үйэттэн үйэҕэ бэриллэн, киһи-аймах бүгүҥҥэ дылы сайдан-үүнэн кэллэҕэ. Бибилэтиэкэ – култуураҕа уһулуччу тирэхтэнэр туспа эйгэ буолар. Урут бибилэтиэкэ сүрүн соруга садьыгы харайан уура сылдьан, ааптартан ааҕааччыга тиэрдии эрэ этэ. Билигин бибилэтиэкэ суолтата, ыыра быдан кэҥээн турар.
Мырылаҕа култуураны сайыннарыы устуоруйата: Мырыла нэһилиэгэр култуураҕа үлэ сайдыытыгар ыччаттар, комсомолецтар сүҥкэн (улахан) кылааттарын (вкладтарын) киллэрбиттэрэ диэтэххэ, сыыспаппыт (атыннык этэр кыахпыт суох). 1932 сыллаахха комсомол тэрилтэтэ төрүттэниэҕиттэн, нэһилиэккэ кыһыл муннуктар арыллан, 1937 сылтан «Ааҕар балаҕан» үлэтин саҕалаабыта. Ол кэмҥэ тыа сирин нэһилиэнньэтин култуураҕа-сырдатар (просветительскай), тэрийэр-маассабай үлэлэрин киинниир, көрдөрөр миэстэлэрэ (оннулара) суоҕа.
Бибилэтиэкэ үлэтин саҕаланыыта: «Ааҕар балаҕаҥҥа» 1936-1937 сылларга Кривошапкин Д.Ф. үлэлээбитэ. Кинини салгыы колхоз бэрэссэдээтэлинэн талбыттарын кэннэ, 1938-1939 сылларга Беляев Петр Тимофеевич солбуйбута. 1939-1940 сылларга Петров Семен Дмитриевич үлэлии сырыттаҕына, оройуоҥҥа үүт-эт собуотугар ыҥырыллыбыта. Онно үлэлии сылдьан, сэбиэскэй аармыйаҕа ыҥырыллан сэриигэ барбыта.
Сэрии ыар сылларыгар «Ааҕар балаҕаны» уларыйа сылдьан (атын-атын дьон) кыргыттар үлэлэппиттэрэ. Сэрии кэннинээҕи үлэ: 1946 сыллаахха алтынньы 1 күнүттэн Дмитрий Мирофанович Васильев «Ааҕар балаҕаны» салайан, үөрэхтээһиҥҥэ дьону түмэ тарпыт талааннаах (дьоҕурдаах) салайааччы буолбута. Кини 1959 сыллаахха саҥа аһыллыбыт бибилэтиэкэҕэ сэбиэдиссэйинэн (сүрүн үлэһит) ананан, нэһилиэнньэ ортотугар үгүс сырдатар, сэргэхситэр үлэни уһун кэмҥэ (элбэх сыл) ыыппыта.
Билиҥҥи кэмҥэ дылы: Д.М. Васильев кэнниттэн Мордовская, Барашкова, Козлова Прасковья Ивановна, Саввина Екатерина Егоровна, Петрова Е.Х., Алексеева, Софронова Е.И. үлэлээбиттэрэ. 1985 сылтан Титова Александра Александровна, Федорова Елена Ивановна, Хомподоева П.Н., Николаева А.М., Иустинова Галина Константиновна, Сазонова Матрена Николаевна, уус-уран коллективтары тэрийэн, Мырыла култууратын (төрүт тыынын) өрө тардыыга улахан үлэни ыыппыттара. Билигин үлэлии сылдьаллар Игнатьева Мария Гаврильевна, Седалищева Анна Петровна.
ААҔАР УОРАҔАЙ ҮЛЭҺИТТЭРИН КҮНҮНЭН!
КИНИГЭ.
Ис хоһооно кэрэтинэн
Илдьирийбит кинигэҕэ
Иһирэхтик этиллибит
Истиҥ санаа элбэх эбит.
Илдьирийбит кинигэттэн
Иҥэриниэҥ Үйэлээҕи,
Эридьиэстээх этиилэртэн
Эбиниэҕиҥ кэскиллээҕи.
Сомсон ылыаҥ үгүс элбэх
Сонун сырдык санаалары,
Кэм дьыбара үргүппэтэх
Киччим, кэрэ иэйиилэри.
Итэҕэйиэҥ тыл күүһүгэр
Илбиһигэр уһуйулла,
Илгэлэрдээх сүмэтигэр
Ис сүрэхтэн уһаарылла.
Оһуохай Уола
Библиотека ыыппыт тэрээһиннэриттэн хаартыскалар:
Бибилэтиэкэбит күнүнэн эҕэрдэлээн туран, Мырыла нэһилиэгин бибилэтиэкэтигэр салгыы чэчирии сайдарын, элбэх ааҕааччыланарын баҕарабыт! Кинигэ кистэлэҥ күүһэ үйэлэргэ умнуллубат буоллун!