«СИЛА КНИГИ» ААХСЫЙА – КИНИГЭ КҮҮҺЭ, БИЛИИ ТӨРДӨ
«Кинигэ — билии төрдө, кинигэ — үтүө доҕор, сүбэһит» диэн дириҥ суолталаах этиилэри истэн, билэн, ыччаттарга иҥэрэр сыаллаах киһи-аймах бүгүҥҥэ дылы сайдан-үүнэн кэллэҕэ. СӨ Национальнай бибилэтиэкэтэ 2019 сылтан кинигэни, ааҕыыны тарҕатар сыалтан араас таһымнаах тэрээһиннэри ыытар. Быйыл ахсыс төгүлүн ыытыллар «Сила книги» диэн улахан аахсыйа өрөспүүбүлүкэҕэ Култуура сылыгар ананна.
Ыам ыйын 27 күнүгэр, Бибилэтиэкэ күнүн көрсө, быйыл VIII регионнар икки ардыларынааҕы #Силакниги аахсыйаҕа биһиги эмиэ кыттыыны ыллыбыт! Бу тэрээһин П.М.Васильев аатынан Соловьев орто оскуолатын алын кылаас үөрэнээччилэригэр ыытылынна.
Ааҕыыны, биһиги оскуолабытыгар өр кэмҥэ учууталынан үлэлээбит, РСФСР норуотун үөрэҕириитин туйгуна, СӨ учууталларын учуутала, СӨ үөрэҕириитин бочуоттаах бэтэрээнэ, Соловьев нэһилиэгин бочуоттаах олохтооҕо, Евдокия Иннокентьевна Федорова ыытта. Кини Афанасий Петрович Романов – Бабаҕа Баатыр “Чехословакияҕа кыайыы оһуохайа” диэн кырдьаҕас буойун кэпсээниттэн быһа тардан ааҕан, оҕолору сэҥээртэ, дьиҥ олоххо буолбут түбэлтэни иһитиннэрэн оҕолору сөхтөрдө, кинигэ абылаҥын иҥэрдэ.
Бу курдук тэрээһиннэр оҕолорго кинигэни ааҕарга көҕү үөскэтэллэр, төрөөбүт литературабытыгар уонна историябытыгар тапталы иҥэрэллэр.
Аахсыйаҕа кыттыбыт алын кылаас үөрэнээччилэригэр, кинилэри үөрэтэр учууталларга уонна Евдокия Иннокентьевна Федороваҕа барҕа махталбытын тиэрдэбит!