Уһуйаан оҕолоро Улуу кыайыы тыынын эбээ кэпсээнинэн билистилэр.
Ыам ыйын 7 күнүгэр, «Төрөөбүт тыл биһигэ» киин уһуйаан иитиллээччилэригэр аналлаах «Эбээ ааҕар» дорҕоонноохтук ааҕыы уонна «Сахалыы оонньуохха» тэрээһиннэри ыытта.
Бу күн Аҕа дойду Улуу сэриитин бэтэрээнэ 1-кы группалаах инбэлиитэ, 1-кы истиэпэннээх уордьан кавалера, буойун-учуутал Петр Семенович Сыромятников туһунан төрөппүт кыыһа, элбэх сиэн эйэҕэс эбэтэ, Соловьев нэһилиэгин биир мааны далбар хотуна Анна Петровна Седалищева «Өйдүүбүт, киэн туттабыт, сүгүрүйэбит» диэн кинигэттэн кып- кыра оҕолорго кэрэхсэбиллээхтик кэпсээтэ. Кини хорсун аҕатын наҕараадаларын, мэтээллэрин, уордьанын хаартыскаларын көрдөртөөтө уонна олоҕун сырдатта.
Оҕолор эбэ кэпсээнин сүрдээҕин больҕомтолоохтук, сэҥээрэн иһиттилэр, хаартыскалары көрөн олус интэриэһиргээтилэр. Мэтээллэрин, уордьанын илиилэринэн тутан көрөн сөхтүлэр. Бу курдук дьиэ кэргэн историятын нөҥүө Кыайыы улуу өйдөбүлүн тиэрдии оҕоҕо ытыктабылы, киэҥ билиини иҥэрэр.
Ону таһынан, саха оҕото барыта таптаан оонньуур күөрчэх оонньууну уонна быаны эрийии оонньууну оонньоттубут. Бу оонньуулар оҕоҕо чөл олоҕу, түмсүүнү үөскэтэллэр.
Бу тэрээһини тэрийбит «Төрөөбүт тыл биһигэ» киин үлэһиттэригэр, эйэҕэс эбэбитигэр Анна Петровна Седалищеваҕа уонна кыттыбыт оҕолорго, иитээччилэргэ барҕа махталбытын тиэрдэбит!
✨
