СОЛОВЬЕВ НЭҺИЛИЭГЭР «Мааны ыалдьыт» олоҥхону истэр күн ааста
Муус устар 16 күнүгэр, норуот айымньытын дьиэтигэр, П.М.Васильев аатынан Соловьев орто оскуолатын 1-8 кылааска диэри үөрэнээччилэргэ, «Төрөөбүт тыл биһигэ» киин көҕүлээһининэн «Олоҥхону истии» күнэ үрдүк таһымнаахтык ыытылынна.
Олоҥхо — саха омук былыргы дьыллар быыстарыттан уостан уоска бэриллэн кэлбит, ЮНЕСКО аан дойду шедеврынан биллэрбит улуу айымньыта. Биһиги түөлбэбит былыргыттан айылҕаттан айдарыылаах олоҥхоһуттарынан киэн туттар. Ол үтүө үгэһи Анатолий Николаевич Христофоров курдук маастардар салгыы сайыннараллар.
Тэрээһин хаамыыта:
- Арчылааһын: Оҕолорбутун буруонан, чуораан тыаһынан арчылаан, ыраастаан көрсүбүппүт.
- Төрүт ас: Сахалыы маанылаах аспытынан (алаадьы, саламаат, быыппах) фуршет оҥорон күндүлээтибит.
- Куукуланан туруоруу: Биир дойдулаахпыт Константин Лукич Федоров — Көскөйө Көстөкүүн «Күн Тэгиэримэ» олоҥхотун куукулаларынан хамсатан көрдөрүү оҕолорго улахан сэҥээриини үөскэттэ.
- Маастар-кылаас: Олоҥхо ааҕыытыгар республика, аан дойду таһымнаах үрдүк наҕараадалаах, киэн туттар олоҥхоһуппут Анатолий Николаевич Христофоров оҕолорго маастар-кылаас ыытта. Оҕолор бэйэлэрэ олоҥхону ааҕарга холонон көрдүлэр.
- Быыстапка: «Мырыла олоҥхоһуттара» диэн оҕолор оҥорбут докладтарын уонна кинигэ быыстапката туруорулунна.
Бу курдук төрүт тыыннаах үлэни ыыппыт бары тэрийээччилэргэ, кыттыыны ылбыт оҕолорго уонна учууталларга барҕа махталбытын тиэрдэбит!
Олоҥхобут тыына өрүү тыыннаах буоллун!