Буойуттарбытыгар өйөбүл.
Соловьевтааҕы олохтоох библиотекаҕа, 3 күн устата, биһиги дойдубут инники кэскилин, эйэлээх олоҕун харыстыы сылдьар хорсун буойуннарбытыгар – Анал Байыаннай Дьайыыга (СВО) сылдьар уолаттарбытыгар анаммыт, бүтүн Россиятааҕы Добровольцы волонтерскай хамсааһын Мырылатааҕы филиалын «Харыстаана» эмтээх оту хомуйар далбар хотуттара, ааспыт сайын хомуйан, куурдан-хатаран оҥорбут отторуттан: кучуттан, моонньоҕон сэбирдэҕиттэн, дөлүһүөн отонуттан, мутукчаттан «Дойдум эмтээх чэйэ» диэн 31шт чэйдэри оҥордулар, ону тэҥэ бары түмсэн ийэлэр, эбээлэр, эдьиийдэр, үөрэ оттоох, боҕуруоскай оттоох, сиэллээх, туостаах, чаҕылхан охсубут мастаах, буруонан ыраастанар арчыланар 65шт хомууру уонна барыта 80шт Харысхаллары оҥорууга мустан, үлэ бөҕөтүн ыыттылар.
Биһиги нэһилиэкпит ийэлэрэ, эбээлэрэ, балтылара, эдьиийдэрэ бары сомоҕолоһон кэлэн, истиҥ сүрэхтэринэн алҕаан , куһаҕантан харыстыыр, үтүөнү түстүүр күүстээх Харысхаллары хаартыскаҕа көстөрүн курдук, оҥордулар.
Амарах санаалаах дьоммут, халыҥ фетр, горячай клей, клей момент прозрачнай, харысхал бэлиэлэр тимирдээх, уһун быалар уо.д.а. матырыйааллары барытын бэйэлэриттэн аҕалан оҥортоотулар.
Бу бэлиэ түгэҥҥэ ийэлэр, эбээлэр, балтылар, эдьиийдэр оҥорбут дьоруойдуу санааҕа олоҕурбут Харысхаллара – биһиги уолаттарбытыгар саамай күүстээх өйөбүл, тирэх буолан, күтүр уот быыһыттан хорсуннук тахсалларыгар көмөлөһүөҕэ. Сүрэхтэн оҥоһуллубут, таптал тыынынан иитиллибит бу Харысхаллар дьиҥнээх күүһү биэрэн, дойдуларын көмүскүүр уолаттарбыт чугас дьоннорун ис айыы тыынын, тапталларын өрүү ыҥырыаҕа.
Махтал барыгытыгар, кэлэн көхтөөхтүк кыттыбыккытыгар! Бу биһиги сомоҕолоһуубут уонна эйэлээх олохпут туһугар биир улахан хардыы буолар.
