Төрөөбүт тыл күнүн сэргэхтик бэлиэтээтибит!
Олунньу 13 күнүгэр — Ийэ тыл уонна сурук-бичик күнүгэр — олохтоох бибилэтиэкэҕэ үтүө үгэскэ кубулуйбут «Сахалыы дьыктаан» аахсыйата буолан ааста.
Дьыктааны, Өрөспүүбүлүкэбитигэр культура сылынан, Д.М.Васильев аатынан НАДь уус-уран салайааччыта Сардаана Григорьевна Федорова аахта. Дьыктаан Суорун Омоллоон «Чүөчээски» кэпсээниттэн «Толугур алаас» туһунан, тиэкис уопсайа 206 тылтан турда.
Бу тэрээһиҥҥэ ийэ тылбыт ырааһын, таба суруйуу быраабылаларын тутуһууну тургутан көрөөрү уопсайа 9 киһи кытынна, дьыктааны бары олус үчүгэйдик суруйдулар. Сылтан сыл ахсын бу аахсыйаҕа кыттар дьон ахсаана эбиллэрэ, дьон бэйэтин тылыгар интэриэһэ үрдүүрэ киһини эрэ үөрдэр.
Дьыктаан түмүгүнэн «Бастыҥтан бастыҥ суруксут» ааты ылары ситистэ Вера Иннокентьевна Луковцева П.М.Васильев аатынан Соловьев орто оскуолатын психолог учуутала, «Бастыҥ суруксут» ааты ылла Вероника Вячеславовна Попова П.М.Васильев аатынан Соловьев орто оскуолатын физика учуутала, «Үчүгэй суруксут» ааты ылла Дария Петровна Богатырева П.М.Васильев аатынан Соловьев орто оскуолатын дьааһыла-саадын повара, , уонна «Саамай кыраһыабай буочар» номинацияны ылла бочуоттаах сынньалаҥҥа олорор Надежда Егоровна Макарова.
Дьыктаан кэнниттэн, түөлбэлэринэн өй оонньуута ыытылынна. Манна кыттааччылар бэйэ-бэйэлэрин кытта күөн көрсөн, өй-санаа таһымын, сахалыы тыл баайын уонна түмсүүлээхтэрин көрдөрдүлэр. Түөлбэлэр икки ардыларыгар буолбут тыҥааһыннаах, ол эрээри олус истиҥ киирсии барыбытыгар күүс-уох, саҥа билиини биэрдэ.
Өй оонньуутугар 1 миэстэни ылары ситистилэр «Чэчир» түөлбэ, 2 миэстэни ылла «Сардаҥа» уонна 3 миэстэни ылла «Таастаах» түөлбэ.
Маннык бэлиэ түгэннэр төрөөбүт тылбытын харыстыырга, нэһилиэк дьонун сомоҕолуурга улахан суолталаахтар. Кыттыыны ылбыт бары дьоҥҥо барҕа махтал!
Онтон киэһэ түөлбэлэр икки ардыларыгар азартаах «Сахавабол» күрэҕэ буолан ааста.
Бу сэргэх оонньууга нэһилиэк түөлбэлэриттэн хомуллубут хамаандалар кыттыыны ыллылар. Хас биирдии хамаандаҕа 5 эр киһи уонна 5 дьахтар – уопсайа 10 киһи – киирэн, доҕордоһуу, күрэстэһии тыынынан салайтаран, күүстэрин, сымсаларын холостулар.
«Сахавабол» оонньуута кылгас кэмҥэ да буоллар барытын умнан, санаабытын күүрээннээх күрэххэ ууран, элбэх үчүгэй эмоциялары бэлэхтээтэ. Оонньуу күүрээнэ мустубут дьону барытын ыгыллыыга тутта, хас биирдии хамаанда бэйэтин уратытын көрдөрдө. Оонньуу түмүгүнэн 1 миэстэни ылары ситистилэр «Таастаах», 2 миэстэни «Сардаҥа» түөлбэ, бочуоттаах 3 миэстэни ылла «Чэчир» түөлбэ.
Маннык тэрээһиннэр нэһилиэк дьонун сомоҕолуур, биир түмсүүгэ мунньар, доҕордоһууну күүһүрдэр аналлаахтар. Күрэххэ кыттыбыт бары дьоҥҥо, ыытааччыларга барҕа махтал!