Сонуннар.
Олунньу 3 күнүгэр норуот айымньытын дьиэтигэр «Мааны ыалдьыт» олоҥхону истии эйгэтин тэрийии бырайыагын, нэһилиэктэргэ фольклор хайысхаларын сайдыытын тула ыытыллар үлэ чэрчитинэн төгүрүк остуолу олоҥхо киинин салайааччыта Дмитрий Дмитриевич Попов ыытта.
Бу күн Иннокентий Иннокентьевич Собакин олоҥхоһуттар тустарынан историяны кыратык сэгэтэн кэпсээтэ. Анатолий Николаевич Христофоров олоҥхону сайыннарыыга, оҕолору олоҥхо эйгэтигэр угуйарга баҕа санааларын эттэ. Елена Васильевна Захарова НАДь дириэктэринэн үлэлии сылдьыбыт практикатыттан, олоҥхоҕо дьону көҕүлүүргэ сүбэ-ама биэрэн үллэһиннэ.
Ол кэннэ олоҥхону толорооччу 2024 сыллааҕы Ил Дархан стипендиата, Нерюнгри куоракка ыытыллыбыт олоҥхо ыһыаҕын Кылаан кыайыылааҕа Суссанна Васильевна Лазерева олоҥхолуурун бары сэҥээрэ иһиттибит.
Уонна Нерюнгри куоракка ыытыллыбыт Олоҥхо ыһыаҕын 3 үрдэлин хаһаайынын Давид Андреев оһуохайынан тэрээһин түмүктэннэ.
Олунньу ый 5 күнүгэр «Айылгы» норуот айымньытын дьиэтигэр, быйыл өрөспүүбүлүкэбитигэр Ил Дархан ыйааҕынан Култуура сыла биллэриллэн, биһиги улууспутугар култуура сылын арыйар үөрүүлээх тэрээһин буолла. Манна нэһилиэктэртэн култуура эйгэтин бары үлэһиттэрэ сүргэлэрэ көтөҕүллэн туран түмүстүлэр.
Эҕэрдэ тылы улуус дьокутааттарын Сэбиэтин бэрэссэдээтэлэ Яков Оконешников, баһылыгы социальнай боппуруостарга солбуйааччы Мария Кронникова эттилэр, бу сыл ситиһии көтөллөнөрүгэр баҕардылар.
Култуура салалтатын начаалынньыга Петр Гуляев быйылгы сыллаах былааннарга тохтоото:
- Үүммүт 2026 сылга сүрүн болҕомтону тыа сиригэр Норуот айымньытын сайыннарыыга уурабыт. Онно сыал-сорук туруоран, Култуура сылын былаана уонна тутаах тэрилтэбит «Айылгы» Норуот айымньытын дьиэтин тосхоло оҥоһулунна.
Бастакынан, маастардарга улуус баһылыгын Грана олохтонон, бастыҥ бырайыактаахтарга туттарыллыахтаах.
Иккиһинэн, үҥкүү, ырыа, тыйаатыр, фольклор көрүҥнэрин харыстыыр уонна сайыннарар соруктаах «Талба талааннар» бырагыраама чэрчитинэн нэһилиэктэр икки ардыларыгар комплекснай күрэхтэһии ааҕыытыгар киирэн, сыл устата былааннаах үлэ тэриллиэхтээх.
Үсүһүнэн, исписэлиистэрбитин хайысханан үөрэтэр, квалификацияларын үрдэтэр сыаллаах «Талба талааннар» бырагыраама чэрчитинэн, сыл устата маастар-кылаастар, сэминээрдэр уонна култуура ааҕыылара ыытыллыахтара.
Төрдүһүнэн, быйылгы «Айхаллан, Чурапчы» уус-уран самодеятельноспыт фестивала биирдиилээн нүөмэрдэр хаачыстыбаларыгар туһуланан, академическай кэнсиэр быһыытынан ыытыллыахтаах. Улуустааҕы Олоҥхо ыһыаҕар бэлэмнэнэн элбэх фольклор нүөмэрэ киирдэ уонна үҥкүү, ырыа хайысхаларыгар болҕомто уурулунна. Быыстапка хайысхатыгар быйылгы фестивальга туос көрүҥүн көрүөхпүт. Манна даҕатан эттэххэ, Чурапчыбыт улууһугар уус-уран самодеятельность фестивала ыытыллыбыта төгүрүк 70 сыла буолар, — диэн Петр Егорович кылгастык билиһиннэрдэ.
Маны тэҥэ материальнай-техническэй базалары сайыннарыы, саҥардыы, Андрей Саввин 130 сыллааҕы тэрээһиннэрэ, ааҕыы култууратын үрдэтии, талааннаах оҕолору таһаарыы, о.д.а улахан үлэлэр күүтүллэллэр.
Чурапчы улууһун култууратын уонна ускуустубатын сайдыытыгар кылааттарын иһин махтал суругунан Чурапчытааҕы кииннэммит бибилэтиэкэ ситимин, А.А. Саввин аатынан түмэл, А.П. Гоголев аатынан Чурапчытааҕы Оҕо ускуустуба оскуолатын, А.В. Посельская аатынан Дириҥнээҕи Оҕо ускуустуба оскуолатын, И.Н. Винокуров аатынан “Айылгы” НАДь, И.И. Кандинскай аатынан “Айыллаан” КК кэлэктииптэрэ наҕараадаланнылар.
Ааспыт сыл түмүгүнэн анал ааттар туттарылыннылар. «Лучшее освещение деятельности в цифровых ресурсах» ааты Кытаанахтан “Түһүлгэ” НАДь, «Лучшая организация работы клубных формирований» ааты Одьулуунтан “Сайдыс” НАДь, «Лучшая организация досуга для различных категорий населения» ааты Алаҕартан “Ырыа” НАДь, «Лучшая деятельность по сохранению народных традиций» ааты Болтоҥоттон В. Саввин аатынан НАДь, «Лучшая деятельность по развитию народного творчества» ааты Хатылыттан “Ситим” НАДь ыллылар.
Үөрүүлээх күҥҥэ сөп түбэһиннэрэн, култуура салалтата Мария Кронникованы, Таисия Брызгаеваны кытта олоҥхоҕо уонна декоративнай-прикладной хайысхаларга үс өрүттээх сөбүлэҥи түһэристилэр.
Ол кэннэ хайысхаларынан билим дьарыктара ыытылыннылар.