Чурапчыга «Ыал саргыта» форум.
«Ыал саргыта» бырагыраама сылы түмүктүүр дьаһала — форум «Айылгы» НАДь ыытылынна.
Форуму улуус баһылыгын социальнай боппуруостарга солбуйааччыта Мария Кронникова иилээн-саҕалаан ыытта. Форум үс хайысханан барда.1-кы «Тыа сирин ыччат ыалын сайдар кэскилэ» хайысхаҕа Хадаар нэһилиэгин баһылыгын солбуйааччыта Перизат Дьячковская, «Эргис» ТХПК салайааччыта Виктор Петров уонна Төлөйтөн Александра, Аман Максимовтар кытыннылар. Кинилэр тыа сиригэр ыччаты олохсутууга бэйэ уопутугар олоҕуран, көрүүлэрин эттилэр. Истээччилэргэ тыа да сиригэр бэйэ дьыалатын тэринэн, үбү-харчыны өлөрөн, киһи кыахтаахтык, олоҕун уйгутун тупсаран олоруон сөбүн итэҕэттилэр.
2-с «Дьиэ кэргэн — ийэ тыл биһигэ» хайысхаҕа Таатта улууһун Аҕа түмсүүтүн салайааччыта Гаврил Вырдылин уонна саха тылын пропагандалааччы Уйгулаана Николаева — Сай Саха ийэ тылбыт сүппэтин, симэлийбэтин уонна кэнчээри ыччаппыт төрүт тылынан саҥаралларын туһугар санааларын атастастылар. Гаврил оҕолорбутугар бэйэбит силиспитин-мутукпутун, төрүччүбүтүн биллэхпитинэ эрэ олоххо чиҥник үктэнэн сылдьыахпыт диэн этэр. Бэйэтин дьиэ кэргэнэ, бииргэ төрөөбүттэрэ, аймахтара бука бары сахалыы тылы өрө тутан, куттуун-сүрдүүн саха тыла, үгэһэ сүппэтигэр күннэтэ үлэлэһэллэрин көрдүбүт.
3-с «Чэгиэн буолуу үөрүйэхтэрэ» хайысхаҕа А. Саввин аатынан түмэл дириэктэрэ Афанасий Захаров уонна Хадаартан Камила, Афанасий Мордускиннар кытыннылар. Афанасий Захаров А. Саввин чинчийиитигэр олоҕуран, саха киһитэ чэгиэн буоларыгар бэйэ төрүт аһынан аһыахтааҕын, ол хайа да омук аһынааҕар иҥэмтиэлээҕин эттэ. Камила Мордускина оҕону кыра эрдэҕиттэн эт-сиин өттүнэн сайыннарар тренажердары оҥорон туһаналларын сырдатта.
Салгыы форум үөрүүлээх чааһыгар улууспут дьиэ кэргэттэрин чиэстээтилэр ол курдук Соловьев нэһилиэгиттэн бастакы оҕотун төрөппүт ийэлэргэ 50 тыһыынча солкуобайдаах сертификаты Богатырева Марина Петровна ылла.
«Силистээх сис ыал» 5 кыайыылаахтартан биирдэстэрэ Брызгаевтар дьиэ кэргэн буоллулар.
«Ааҕар саха сайдам ыала» куонкуруска Николаевтар дьиэ кэргэн 3 миэстэни ылан харчылаах сертификатынан наҕараадаланнылар.
