Чурапчыга «Бииргэ ааҕабыт» бэстибээл
Ахсынньы 5 күнүгэр А.П.Гоголев аатынан Чурапчытааҕы оҕо ускуустубатын оскуолатыгар үгэскэ кубулуйбут «Бииргэ ааҕабыт» дьиэ кэргэн бэстибээлэ ыытылынна. Быйыл тэрээһин улуустааҕы оҕо бибилэтиэкэтин 70 сылыгар ананна. Манна Кытаанах, Хоптоҕо, Одьулуун, Төлөй, Чурапчы, Сылаҥ, Мугудай, Соловьев, Арыылаах нэһилиэктэриттэн 9 дьиэ кэргэн кытынна. Дьоһун тэрээһин үөрүүлээх чааһыгар кииннэммит библиотечнай ситим дириэктэрэ Айталина Смирникова, улуус култуураҕа управлениетын исписэлииһэ Мария Васильева эҕэрдэ тылларын эттилэр.
Бу күн кыттааччылар бэлэмнээбит «Книга моей семьи» диэн буктрейлердарын экраҥҥа көрдүбүт. Хас биирдии дьиэ кэргэн оҕолорун хайдах ааҕарга уһуйалларын, сөбүлээбит кинигэлэрин сюжетын видео оҥорбуттара көрөөччүлэр болҕомтолорун тарта. Бу кыттааччыларга дьиэҕэ үлэ быһыытынан эрдэттэн бэриллибит сорудах этэ. Түмүгү Е.А.Борисов аатынан архыып-бибилэтиэкэ цифровой технология салаатын сэбиэдиссэйэ Саргылана Флегонтова билиһиннэрдэ. Кыайыылаахтарынан Мугудайтан Мария Максимовна Сивцева кыргыттарынаан буоллулар. Иккис миэстэҕэ Соловьев нэһилиэгиттэн Наталья Михайловна Николаева кыыһынаан Христиналыын, үһүс миэстэҕэ Сылаҥ нэһилиэгиттэн Ивановтар дьиэ кэргэн таҕыстылар.
Буктрейлеры киирэн көрөр сигэ: https://rutube.ru/video/254f9aaad3ab3fbd87202483760de0dc/?r=a
Маны таһынан «Лучше всех» түһүмэххэ дьиэ кэргэттэр талба талааннарын көрдөрдүлэр. Холобур, Соловьев нэһилиэгиттэн Николаевтар илиинэн оҥоһуу, «Хатан Тэгиэримэ» персонажтарыттан куукулалары уонна «Хатан Тэгиэримэ» оҕолорго анаан версия кинигэтин оҥорбуттарын көрдөрдүлэр. Кытаанахтан Борисовтар уоллара 8 саастаах Эрсаан ийэтинээн Ксения Николаевналыын саха төрүт аһын тар оҥоруутунан дьарыктаналларын сырдаттылар. Ааспыт сайын Эрсаан бэйэтин сатабылын үллэстэн 11 кэрэ аҥарга маастар кылаас ыытан үөрэппитин кэпсээтэ. Хоптоҕоттон Адриана Хоютанова ийэтинээн Кристина Александровналыын алмазнай мозаиканан үлүһүйэн дьарыктаналлар эбит. Одьулуунтан 6 саастаах Харысхан Жегусов «Дьулуруйар Ньургун Боотур» олоҥхоттон быһа тардан толорбутун олус диэн биһирээтибит. Бу курдук бииртэн биир чаҕылхай талааннаах оҕолор, төрөппүттэр сатабылларын көрдөрдүлэр. Хас биирдиилэригэр «Лучше всех» анал статуэтка туттарылынна.
Тэрээһини А.П.Гоголев аатынан Чурапчытааҕы оҕо ускуустубатын оскуолатын фортепиано, флейта кылааһын үөрэнээччилэрэ, «Үөрүү» оҕо дьоҕурун сайыннарар киин иитиллээччилэрэ кэрэ муусуканан киэргэттилэр, оҕо бибилэтиэкэтин сэбиэдиссэйэ Ольга Эверстова, «Айыллаан» култуура киинин исписэлииһэ Петр Дьяконов иилээн-саҕалаан ыыттылар.
