Софрон Ионович Кузьмин — Олоҥхоһут Соппуруон төрөөбүтэ 135 сыла.
Сэтинньи 25 күнүгэр Д.М.Васильев аатынан НАДь, олоҥхо Аан дойдутааҕы ЮНЕСКО тэрилтэтин саамай үрдүк билиниитин ылбыта 20 сылынан, быйылгы үбүлүөйдээх олоҥхоһуппутун Софрон Ионович Кузьмин — Олоҥхоһут Соппуруон төрөөбүтэ 135 сылынан сырдатыы, олоҥхо декадатын арыйыы тэрээһинэ буолан ааста.
Бу күн, сахалыы таба суруйуу үөрүйэҕин сайыннарар, олоҥхо баай тылын өһүн, билиини-көрүүнү кэҥэтэр сыаллаах Өрөспүүбүлүкэтээҕи «Олоҥхо дьыктаана» аахсыйаҕа кытынныбыт. Дьыктааны П.М. Васильев аатынан Соловьев орто оскуолатын завуһа Акулина Романовна аахта, сыаналары туруортаата.
Олоҥхоһут Соппуруон туһунан кэлбит ыалдьыттарга сырдаттыбыт.
Софрон Ионович айбыт «Мырыла» диэн тойугун Д.М.Васильев аатынан НАДь уус-уран салайааччыта Эрсан Громов дорҕоонноохтук ааҕан иһитиннэрдэ.
Үбүлүөйдээх киһибитэгэр сыһыаннаах оонньуулары хамаандаларга арааран станцияларынан оонньоттубут.
Оонньуу түмүгүнэн «Эрчим» хамаандата бочуоттаах 3 миэстэни ылла, «Боотур» хамаантада 2 миэстэни ылары ситистэ уонна «Дьулуур» хамаандата 1 миэстэ буолла. Оонньууга бары олус көхтөөхтүк кыттан минньигэс бириистэринэн, добун суруктарынан наҕараадаланнылар.
Ону таһынан Олоҥхоһут Соппуруон аймахтарын аатыттар, кэлбит ыалдьыттарга, сүрдээх наадалаах бириис оонньотто (төрүччү кинигэтэ), бирииһи П.М.Васильев аатынан Соловьев орто оскуолатын 8 кылааһын үөрэнээччитэ Витя Никулин сүүйэн ылла.
«Олоҥхо дойдутугар айан» кинигэ быыстапката турда.
Бары кэлэн сылдьыбыт, көхтөөхтүк кыттыбыт, көмөлөспүт дьоммутугар махтал!