Анемподист Иванович Софронов — Алампа бүгүн төрөөбүт күнэ.
Анемподист Иванович Софронов — Алампа саха литературатын төрүттээччи, поэт драматург, саха тыйаатырын аҕалаатар аҕата, бастакы хаһыаттары, сурунааллары тэрийсээччи, саха искусствотын теоретига, тылбаас оскуолатын, литературнай кириитикэни төрүттээччи.
Варвара Платоновна Семенова — Байбаралаах Балбаара Алампаҕа анаан хоһооно:
Алампа «Сэрэх» хоһоонугар
Алампалыыр убайбыт
Кэлэр кэми курдат таайан,
Үүнэр үйэни өтө көрөн,
Киирии омукка умсугуйан
Төрүт тылбыт бахтайан,
Кэскилбит кэлтэйиэҕин,
Кэнэҕэскибит кэхтиэҕин,
Сэмээр сэрэтэ сэһэргээбит.
Бүтүн үйэ нөҥүөлээн
Эҥсэ эппит тыллара,
Кутаа уоту саҕардыы
Кыымы ыһа күөдьүтэн
Өркөн өйү өрүкүтэллэр.
Тоҕус уонтан ордубут,
Тоҕус сылы куоһарбыт,
«Кэрэ кэриэс тыллара
Кичэллэн туран кэскиллэнэр»,
Амалыйбыт алгыстара
Аныаха дылы арчылыыллар.
Алампалыыр убайбыт
Араҕас сулус кэриэтэ,
Аргыс буола сирдьиттии,
Айыы дьонун арыаллыы,
Аартыктары сырдатар.
Байбаралаах Балбаара