Өрөспүүбүлүкэ күнэ.
1922 сыл муус устар 27 күнүгэр ылыллыбыт Саха Автономията, оччотооҕу Саха уобалаһа өрөспүүбүлүкэ быһыытынан статустаммыта бүгүҥҥү күҥҥэ хас биирдиибитигэр сүҥкэн улахан суолталаах. Саха Автономнай Сэбиэскэй Социалистическай Өрөспүүбүлүкэтин төрүттээбит саха чулуу дьоно М.К.Аммосов, П.А.Ойуунускай, И.Н.Барахов, В.В.Никифоров-Күлүмнүүр сыралаах үлэлэрин, күүстээх туруорсууларын түмүгэр Саха Автономията баар буолбута.
Үүнэр көлүөнэ ыччакка анаан, муус устар 29 күнүгэр П.М.Васильев аатынан Соловьев орто оскуолатын 5-11 кылааска диэри үөрэнээччилэригэр, Саха автономията төрүттэммит күнүгэр, М.В.Федорова оскуола бибилэтиэкэтэ, П.Н. Эверстова педагог-организатор салайааччылардаах Өрөспүүбүлүкэ күнэ ыытылынна.
Тэрээһиммитин Сахабыт Сирин уонна Чурапчыбыт улууһун Өрөгөй ырыатынан арыйдыбыт.
Оҕолор «Дьулуур», «Эрэл», «Эрчим» хамаандаларга арахсан «Төрөөбүт төрүт дойдум» интеллектуальнай оонньууга кытыннылар. Оонньуу уопсайа 6 түһүмэхтэн турда: 1 Түһүмэх «Бэйэни билиһиннэрии», 2 түһүмэх «Биллиилээх дьону таайыы», 3 түһүмэх «Сирдэр, териториялар», 4 түһүмэх «Улуустар гиэрбэлэрин таайыы», 5 түһүмэх «Мозаика таҥыы», 6 түһүмэх «Саха сирин Өрөгөй ырыата».
Хамаандалар үгүс боппуруоска сөптөөх хоруйу биэрэн, тапталлаах дойдубут, Сахабыт Өрөспүүбүлүкэтин туһунан элбэҕи билэллэрэ киһини үөрэ-сөхтөрдө. Оонньуу түмүгүнэн бэрт кыра очукуоларынан араастаһан 1 миэстэни ылары ситистилэр «Эрэл» хамаандата, 2 миэстэни ылла «Эрчим» хамаандата, 3 миэстэни «Дьулуур» хамаандата ыллылар.
Бары кыттыбыт оҕолорго уонна салайааччыларыгар махтанабыт, баҕарабыт чэгиэн олоҕу, үрдүк ситиһиилэри!