Соловьевская библиотека

Кулун тутар 13 күнүгэр, норуот айымньытын дьиэтигэр, ааспыт Аан дойду дьахталларын күнүнэн «Дьахтар ыллыга» тэрээһин буолан ааста.

Дьахтар барахсан олоҕу бэлэхтиир , дьиэ кэргэҥҥэ эрэллээх сыһыаны харыстыыр, алаһа дьиэ сылааһын, этэҥҥэ буолуутун түстүүр аналлаах.

Бу күҥҥэ күн күбэй ийэлэри, эйэҕэс эбээлэри уонна кыталык кыргыттары эҕэрдэлээн Андриан Соловьев ылбаҕай ырыатын ыллаата, Дарина Слепцова кэрэ хомуһун тыаһынан эҕэрдэтин тиэртэ, Анита Белолюбская «Китайский танец под луной» нарын үҥкүүтүн бэлэх уунна.

Ол кэннэ станцияларынан хамаандаларга арахсан оонньоотубут. Кинилэр манна ас да астаатылар, баттах да өрдүлэр, ыллаатылар даҕаны уонна араас өй оонньууларын оонньоон сэргэхсийдилэр. Биһиги кэрэ аҥардарбыт барыга бары сатабыллаахтара киэҥ толкуйдаахтара үөрдэ-сөхтөрөр.

Минньигэс астаах сандалы тула ирэ-хоро кэпсэтэ-кэпсэтэ чэй истибит.

Салҕыы Евдокия Семеновна «Кэлин кэбиһэр» маастар-кылааһыгар сылдьан, баттах киэргэлэ симэх тутуурдаах үөрэ-көтө тарҕастыбыт.

Кэрэ аҥардарбытыгар баҕарабыт алаһа дьиэҕит сылаас, сырдык тапталынан туоллун, доруобай, дьоллоох буолуҥ, куруутун үөрэ-көтө сылдьыҥ!