Соловьевская библиотека

1. Бастаан ис хоһоонун толкуйдуубут. Ол аата илиитигэр туох тутуурдаах, хайдах таҥастаах, тугу гына сылдьар оҕо буолуохтааҕын хараххытыгар ойуулаан көрөҕүт. Эбэтэр куйаар ситимиттэн урукку сыллар оҕолорун, сахалыы таҥастаах оҕолору, остуоруйа дьоруойдарын көрөн үтүгүннэрэҕит.
2. Ирдэнэр: баата, боробулуоха, салгыҥҥа хатар туой, маҥан сап, 2 чайнай ньуоска крахмал, ыстакаан кыра аҥаара оргуйбут уу, акриловай кырааска, киистэ уонна туойунан үлэлииргэ аналлаах тэриллэр.
3. Бастаан туойунан оҕобут сирэйин оҥоробут. Силиконовай киэби (молд) эмиэ туһаныахха сөп. Хаппытын кэннэ хараҕын, хааһын, уоһун, иэдэһин уруһуйдуубут.

4. Онтон боробулуоханан дьардьаматын оҥоробут. Ону баатанан эрийэн баран, ыһыллан хаалбатын гына сабынан кэлгийэн кэбиһэбит. Бу курдук быһыытын таһааран эттээн-сииннээн биэрэбит. Ол кэнниттэн сирэйин килиэйдиибит.

5. Клейстер оҥоробут: крахмалы кыра тымныы ууга кутан булкуйабыт. Ол үрдүгэр оргуйбут итии ууну кутан эмиэ үчүгэйдик булкуйабыт.

6. Таҥаһын оҥорорго баатаны чараас гына сыбаан сонун, ыстаанын, бэргэһэтин, үтүлүгүн, хаатыҥкатын моһуонун таһарабыт.

7. «Таҥыннаран» баран хатара уурабыт. Биир суукка үчүгэйдик куурбутун кэннэ акриловай кыраасканан таҥастарын өҥнөөн биэрэбит.

8. Бу оҕобут уол. Кини хоккей оонньуурун сөбүлүүр эбит. Ол иһин, халыҥ хортуонтан клюшка оҥорон туттарабыт. Бу оннугар бэлэх, бэрэски, апельсин эҥин туттарыахха сөп.

Оонньуурбут бэлэм буолбутун кэннэ биэтилэтигэр быа кэтэрдэн баран харыйаҕа ыйаан кэбиһэбит.

Кэлэн иһэр саҥа дьылынан!