Соловьевская библиотека

Бүгүн ахсынньы ый 11 күнүгэр аан дойду үрдүнэн хайа күнэ.

Хахыйах сыҥаһа сыырыттан соҕуруу диэкки күлүгүрэн көстөр Буор Хайаттан ыла, Мырыла утары, Чурапчы-Таатта ыпсыытынан тумустуу үтэн киирэр Тэйэр Хайаҕа диэри, хас да көһүнэн тайаан иилии эргийэр киһи-аймах өйүн-санаатын сөхтөрөр, үгүс үйэлэр тухары иһиллээбит курдук, иһийэ нуктуу, иҥиэттэ суодаһан тураллар.

Тэйэр хайаттан соҕуруу диэки тайаан сытар субурҕа хайалар мас аппаларынан, дириҥ хаспахтарынан быысаһар оройдоро бэйэлэрэ тус туһунан анал ааттаахтар. Кинилэр тэллэхтэригэр, аппаларыгар былыргы өбүгэлэрбит, эһэлэрбит сөбүлээн таптаан, дьиэ-уот туттан олохсуйа сылдьыбыт суоллара-иистэрэ, өтөхтөрө сороҕо билиҥҥэ диэри бааллар.

Дьон-сэргэ кэлии өбүгэлэрин, аймах-билэ дьоннорун ытыгылаан, сорох хайаларга, олохсуйа сылдьыбыт аппаларыгар, кинилэр ааттарын-суолларын иҥэртээбиттэр, ону судургутук манна киллэрэбит:

1. Тэйэр хайа хоту оппуоһун тэллэҕэр Собакин С.А. олорбута салгыы Собакин Г.А. олоро сылдьыбыта. Хайа улахан аппатыгар Брызгаев А.Т. — Оччоох олоро сылдьыбыт, ол иһин Оччоох аппата дэнэр.

1. Мохсоҕоллоох хайата. Аппата Сынабыл аппата диэн ааттанар.

1. Киин хайа. Аппата Маадьа, кэлин Кэчэн аппата дэнэр.

1. Сэмэнэбис хайата-Уоттаах аппа. Брызгаев С.Т., Ефимов М. аймахтара олорбуттар.

1. Муунта хайата-Муунта аппата. Хайа анныгар Брызаев Н. олорбута, салгыы уола Брызгаев В.Н. олорбута.

1. Суоллаах хайа — Нэлэгэр аппата.

1. Кыра Сууллар хайа-Дириҥ аппа. Салгыы Харыйалаах Улахан Сууллар аппалара кэлэллэр.

1. Таас хайа — кинини сыста Охонооһой аппата киирэр.

1. Седалищев хайата — аппата эмиэ кини аатынан.

1. Наахай хайата — кэлин Байахам хайата дэнэр. Хайа анныгар былыргы Чолбон, Тэкэйэ уус өтөхтөрө бааллара.

1. Чолбон хайата — Ньалба аппата киирэр.

1. Тырыгытта хайата, кэлин Көбдөх хайата дэммит. Хайа тэллэҕэр Куонаан уус дьиэ туттан, хотон оҥостон кыһын кыстыы, олоро сылдьыбыта. Саас, күһүн Кэниэдэ көҥүһүгэр балыктыыра, бултуура.

1. Өнчөх хайата — аппата Өнчөх аппата дэнэр.

1. Чууллар хайа.

1. Хотоҕойдоох хайа — аппата кыра аппа диэн.

1. Кыһыл хайа.

Ити ааттанар хайалартан тэйиччи соҕуруу Буор хайа кэлэр, Амма биэрэгэ Буор, Таас, Тэйэр хайалар тэллэхтэригэр ыга анньыллан сытар.